David Henry Watkins

David Henry Watkins (28 Genver 1891 - 14 Me 1969) o dyskader, prydydh ha bardh Kembrek ha Kernewek.

Bewnans a-varr ha teylu

Genys veu D H Watkins yn 1891 yn Troedyraur, Kastel Nowydh Emlyn, Kembra, an eyl mab hag ethves flogh dhe David Watkins, tiek, ha Margaret (née Jones). Ev a studhyas yn Pennskol Aberystwyth hag ena mos ha bos dyskader. Yn Kynsa Bresel an Bys yn 1916, ev a vodhegas avel gonner yn Rejiment Riel Artilleri. Wosa an vresel, ev a oberas avel dyskader doronieth yn Skol Ramasek Kelliwik (Callington School), hag Skol Aberteifi, Kembra. Yn 1924 ev a dhemedhis Winifred May Bennett. I a gavas unn mab, David Emlyn, a studhyas yethow yn Pennskolyow Rysoghen ha SOAS, Loundres. Wosa Nessa Bresel an Bys, Watkins a removas dhe Konteth Rysoghen dhe oberi yn Skol Chinnor. Y wrek a verwis yn 1946. Ev a dhemedhis arta yn 1953, dhe Doris Miriam Morgan.

An yeth Kernewek

Drefen bos Watkins ow kewsel Kembrek, hag ev ow tyski yn Kernow, yth esa bern dhodho y'n yeth Kernewek. Ev a vetyas Henry Jenner ha Robert Morton Nance hag ytho y tyskas Kernewek. Wosa omdenna, ev a'y eyl wrek a dhehwelas dhe Gelliwik le may hylli displegya y vern yn yethow. Berdhys veu yn 1961 yn Kastel Porthbud gans an hanow bardhek Carer Brynyow. Ev a veu berdhys ynwedh gans an hanow bardhek Bryn Ceri yn Esedhvos Kenedhlek Kembra yn 1966. Ev a veu kannas lieskweyth rag Kernow yn Esethvos Kembra.

Ev a skrifas bardhonieth, dyllys yn 'An Lef kernewek', kepar ha Tarth an jeth ha Spyrys an Meneth a Lever y Gevrynyow. Chif ober Watkins o gorfenna Trystan hag Ysolt, h.y an kynsa ha hirra kan hwedhlek yn Kernewek arnowdyh. Treylyans rydh yw yn vers a Le Roman de Tristan et Iseut gan Joseph Bédier. An brassa rann a'n gan, ogas dhe 7000 linen, a veu komposys gans A.S.D. Smith ‘Caradar’. Ena David Watkins a geworras ogas dhe 1000 linen wosa mernans Caradar rag kowlwul an hwedhel. Rag henna, ev a waynyas Hanaf Mordon-Caradar, an kynsa dhe'n gul. Ev a oberi avel onan a jif arholysi Kesva an Taves Kernewek. Islewydh Kowethas Kernow Goth Kelliwik o.