Jack Clemo

Reginald John Clemo (Jack Clemo / Pryvyth an Pri) (11 mis Meurth 1916 – 25 mis Gortheren 1994) o prydydh ha skrifer a-dhyworth pluw Eglosstefan yn Branel ogas dhe Sen Ostell, Kernow a esa junyes yn fenowgh gans Kernow ha y grysyans Kristyon. Yth esa y ober prederys avel gwelesigethek hag y feu awenys gans tirwedh garow Kernow. Mab fornyer pri o, ha'y vamm, Eveline Clemo (Polmounter kyns † 1977), o angesfurvyer laghasek.

Chapel Trewydhosa.

Bewnans a-varr

Ledhys a veu tas Clemo orth diwedh Kensa Bresel an Bys ha megys a veu gans y vamm hag yth esa gensi delanwes gwarthevyek warnodho. Y feu adhyskys yn skol an treveglos, mes wosa y 13^ves bloodh y stoppyas y adhyskans formel gans dallathvos y dhelni. Y teuth bodhar a-dro dh'y 20^ves bloodh, ha dall nebes 19 bledhen a-wosa yn 1955. An mongleudhyow ha hwelyow pri china a-dro dhe'n arenebedh le may tevis ev a omdhiskwedhas yn krev yn y ober.

Resegva liennek

Ober a-varr Clema a veu dyllys gans gwask leel, mes y resegva skrifa gwir a dhallathas gans y romans Wilding Graft (Lavur Anwonedhys) a dhyllas gans Chatto and Windus yn 1948, ow kwaynya Atlantic Award. Hemma a veu holyes gans y omvewskrif Confessions of a Rebel (Avowansow Rebel) yn 1949, a selyas Clemo avel skrifer marthek ha derowel. Clemo a dhisplegyas pella avel skrifer hag yn 1951 y tyllas y gensa kuntel The Clay Verge (An Amal Pri). Gorrys yn tirwedh sogh, an bardhonegow a ros nerthow natur hag oberansow gras kales-gwaynyes. Y recevas aswonvos kenedhlek rag an kensa tro dres The Festival of Britain (Gool Breten) le may feu res gwober liennek.

Yn 1970 y feu ordenys bardh a Orsedh Kernow gans titel Prydyth an Pry. Yn 1981, ha 65 bloodh, y recevas doktorieth liennek enor a-dhyworth Pennskol Keresk.

Demedhyans

Pur gryjyk o Clemo hag y krysyas y vos hwans Duw ragdho dhe dhemedhya. Byttegyns nyns o kyns ev dhe dhrehedhes y 50ow a-varr pan vetyas ha dhana demedhya Ruth Peaty a-dhyworth Weymouth yn 1968. Wosa y dhemedhyans yn 1968 y hyllas trovya amal skaffa yn bewnans hag yn y vardhonieth. Y gerensa rag Ruth yw gwithys war gartennow romansek bian a skrifas ragdhi pub bledhen.

Itali

Chanj anwortys yn y skrifa a hwarva wosa dew viaj dhe Itali diwedhes yn y vewnans. Yn 1987 y kodrigas orth Gweneseg ha dhana, hwegh bledhen a-wosa, y viajyas dhe Florence. Hemm a hevelis dhe dhalleth gwersyow lieskweyth liwussa, owth omjunya drama personel bewnans y honan gans skub kryjyans, gonisogeth, tirwedh hag istori Itali. Yn Heretic in Florence y lever yn-kever fler an avon Arno segh ha'y wellheans, orth y dhiskwedhes avel metafor rag livreson y honan a art difeyth.

Mernans hag a-wosa

Clemo a verwis yn Weymouth war 25 mis Gortheren 1994, dhe 78 bloodh.

Yma y baperyow personel ha liennek, lytherow, ha mammskrifow a yeth plen ha bardhonieth gwithys gans Pennskol Keresk.

Yn 1995 y feu dallathys Kestif Bledhennek Bardhonieth Jack Clemo gans an Arts Centre Group wosa degemeres legaci a-dhyworth stat Jack Clemo.

Yn bledhynnyow diwedhes y feu dastardh a les yn Jack Clemo, hembronkys gans skrifer ha golegor Luke Thompson. Hemm a ledyas dhe dhyllans a lyvrow nowyth: Selected Poems (Enitharmon, 2015), A Proper Mizz-Maze (Francis Boutle, 2016), ha The Clay Dump (Guillemot Press, 2016). Plassen a vardhonieth Clemo Clay Hymnal gorrys dhe ilow gwerin Jim Causley a veu dyllys yn 2016, ha'n kensa bewskrif kowal a Jack Clemo, Clay Phoenix (Ally Press, 2016), skrifys gans Luke Thompson, a veu dyllys y'n keth bledhen.

Gorthargyans wosa mernans

Kyns chi Jack Clemo a veu distuys gans Kompani Pri China Goonvian war 6 mis Gwynngala 2005 dhe wul le rag arbrovjiow nowyth. Hemm a vrosas lies sorr gans tus leel ha gans skoodhyoryon an prydydh, re drigsa rag brassa rann y vewnans y'n dyji, marnas an diwettha 10 bledhen wosa movya dhe Weymouth yn 1984.

Oberow

Bardhonieth

• The Clay Verge (1951)
• The Map of Clay (1961)
• Cactus on Carmel (1967)
• The Echoing Tip (1971)
• Broad Autumn (1975)
• A Different Drummer (1986)
• Selected Poems (1988) ISBN 1-85224-052-0
• Approach to Murano (1993, Bloodaxe Books)
• The Cured Arno (1995, Bloodaxe Books)
• The Awakening – Poems Newly Found (golegys gans John Hurst, Alan M. Kent hag Andrew C. Symons)
• Selected Poems (2015, golegys gans Luke Thompson, komendyes gans Rowan Williams, Enitharmon)

Romansow

• Wilding Graft (1948) ISBN 0-907746-17-9
• The Shadowed Bed (1986)
• The Clay Kiln (2000) ISBN 1-900147-20-3

Feythyel

• Confession of a Rebel (1949) omvewskrif
• The Invading Gospel (1958) duwonieth
• The Marriage of a Rebel (1988) ISBN 0-340-48895-6