Kashtin

Duo rock-gwerin a Ganada o Kashtin e'n 1980ow ha 1990ow. Anjei a veu udn a'n bagasow musek moyha sewen hag a vri a'n Kenedhlow Kensa.

Kaner-skrifer Innu Florent Vollant ow performya e'n Lowarth Losowek en Montreal en Mis Hedra 2006

Resegva

Furvyes veu an bagas en 1984 gen Claude McKenzie ha Florent Vollant, dew vusicianer Innu a Maliotenam ryb an Dowr Saint Lawrence en Kebek. Styr an hanow Kashtin ew "herdhwyns" e'n yeth Innu-aimun, bes e feu y'dhewisys drefen an lavaren Sowsnek "cashed in". Breusys veu gen erel anjei dhe hwilas sewena hag arghans. Anjei a dhallathas avel bagas ow kana versyons kanow gen Pink Floyd, U2, Bob Dylan, Neil Young ha'n Beatles kens skrifa ha performya aga hanow aga honan. Aga musek o gen gis rock-gwerin, bes gen tabouryow hengovek Innu (henwys makushan). En kettermyn, Vollant ha McKenzie a weresas fondya Innu Nikamu, gool musek genejek.

En 1988 thera anjei en towlen bellwolok a-dro dhe bobel Innu. Woja hedna askorrer Guy Trépanier a wovydnas anjei dhe rekordya aga huntellyans kensa henwys Kashtin en 1989 en Montreal. Ken feu rekordys an kuntellyans na e'n yeth Innu-aimun, leverys gen 12,000 a bobel en Norvys en udnik, en skon an kuntellyans a dheuth ha bos sewena meur en Kebek, Grenlond ha Kanada Sowsnek ewedh, destys avel platinom dewblek ha gwaynya Prix Félix rag An Gwella Kuntellyans Kensa. "E Uassiuian" ha "Tshinanu" o kanow gerys da dhe'n bagas.

En 1990, an bagas eth war dorn sewen a Europa. Anjei a dhrehedhas an deg kan a-wartha en Frynk.

En 1991, Kashtin a dhallathas aga thorn kensa a-dreus Kanada e'n gwenton ha hav, ha dyllys o aga nessa kuntilow, Innu, e'n kidnyav. An gan "Ishkuess" a dheuth ha bos an onan voyha sewen en Kanada a'n kuntellyans na, hag ewedh aga udnik kan Sowsnek, versyon a "Son of the Sun" gen Willie Dunn. Henwys veu an kuntellyans rag an Pewas Juno, h.y Best World Beat Recording ha Best Roots and Traditional Album en 1992.

En 1992, anjei a dhiskwedhas war dowlen bellwolok CBC Television, Ear to the Ground, ha keskows pellwolok Indian Time II: Fly With Eagles. An vledhen a sew, dalghennys veu McKenzie rag lewya aperys. Ev o e'n prison nebes misow 1994.

Dyllys veu aga treja kuntellyans en 1994, Akua Tuta, gen Columbia Records. Synjys o an gan Akua Tuta gen Robbie Robertson war y guntellyans Music for The Native Americans. Aga hanow veu war sonlerghyow an fylm Dance Me Outside ha'n towlednow pellwolok Northern Exposure ha Due South, ha henwys o an kuntellyans rag Pewas Juno en 1995, h.y Best Aboriginal Recording.

Woja Akua Tuta, Vollant a dheklaryas ev dhe gara kemeres powes dhyworth musek. McKenzie a dhellas y guntellyans solo kensa Innu Town en 1996, hag e tehwelis Vollant en 1999 gen kuntellyans solo Nipaiamianan. Ottobma diwedh aga resegva avel Kashtin, kens anjei dhe weres musicianer hip hop Samian war y versyon a "Tshinanu" en 2010.

Rekordskrif

• Kashtin (1989)
• Innu (1991)
• Akua Tuta (1994)

Ma an erthygel ma usya an Furv Skrifys Savonek a-barth Kernowek diwedhes.