Myhal Servetus
Michael Servetus (an 29ves a vis-Gwynngala, 1511 – an 27ves a vis-Hedra, 1553), (Miguel Servet po, dell o y'n dalleth, Serveto yn Spaynek) o theologydh, medhyk ha densesydh. Didheurek dhodho o lies godhonieth: steronieth ha meteorieth; doronieth, lagha, studhyans an Bibel, awgrym, korfonieth ha medhygieth. Aswonnys yn ta yw ev y'n istori a lies a'n testennow ma, yn arbennik medhygieth ha theologieth.
Dineythys veu Servet yn Aragon, hag ev a studya orth pennskol Zaragoza poken huni Lléida. Y servya va Juan de Quintana, neb o konfessyor dhe Jarlys V. Servet ha Quintana a vyajyas dhe Almayn hag Itali yn 1529, ha Serveto a drigas wosa henna yn Swistir. Y'n blydhynyow 1531 ha '32 y tyllas niver a skrifennow theologiek (De trinitatis erroribus "Kammdybyansow yn kever an Drynses", Dialogorum de Trinitate libri duo "Keskowsow a-dro dhe'n Drynses yn dew lyver" ha De Justitia Regni Christi "Ewnder Reyn Krist"). Pub huni anedha a dest dhe gryjyans arbennik Servet yn kever an Drynses, henn yw, na vo grond mann y'n Bibel rag dyskas an Drynses; byttegyns, Logos Dyw a omjunnsa dhe Yesu pan esa va hwath yn torr Varia Wynn. Ytho, an Logos a dhurya bys vykken war-lergh Servet, mes an Mab o person kreatyes.
Serveto a bassyas yn Pow Frynk ha studya medhygieth yn Paris ha Dalfinat. Ev a dhisputyas orth Jean Calvin dre lyther, hag yn 1553 y tisklaryas unn breuslys frynkek y vos kablus a gammwrians. Dhe Genève ev a fias; mes ena Calvin ha'y dhiskyblyon a'n kachyas. War-lergh gorhemmyn an galvinistyon, Servet veu gorrys dhe vernans gans tan drefenn y gryjyansow.
An erthygel ma yw skrifys yn Kernewek Kemmyn.