Skantlyn:Erthyglow pupteth 0927

Mighal an Gov o hembrenkyas an Gernowyon a geskerdhas dhe Loundres yn 1497. Serrys awos an myghtern dhe vynnes kavoes toll rag omsettya erbynn Alban, Mighal an Gov, trigys yn Lannaghevrann, a erviras mos dhe Loundres rag protestya. Lies den eth ganso, ha’n lu na eth ha bos brassa war an fordh, yn arbennik pan omjunyas gansa Tomas Flamank, den an lagha yn Bosvenegh. Yth esa bresel vyghan yn Guildford, Pow Sows, mes sewen lowr o an Gernowyon. Byttegyns fethys vons gans lu bras an myghtern yn Rosdhu (Blackheath) yn Loundres. Ledhys veu lies Kernow, ha Mighal an Gov a veu kregys, tennys ha kwartronys. Y’n dydhyow ma yma solempnytys pub blydhen yn Lannaghevrann ha Marble Arch yn Loundres, rag kovhe mernans Mighal an Gov ha’n hwarvosow ma.