Clarice Cliff

Deliner priweyth sowsnek o Clarice Cliff (20 mis Genver 1899 – 23 mis Hedra 1972), gweythresek ynter 1922 ha 1963. Hi dheuth deliner priweyth ha penn asran delinyans an gweythva.

Clarice Cliff
Genys	20 Genver 1899  Tunstall
Mernans	23 Hedra 1972  Clayton
Kenedhlogeth	Ruvaneth Unys
Alma mater	Skol Art Burslem
Galwesigeth	priweythydh
Gwiasva	https://www.claricecliff.com/

Bewnans a-varr

Patron 'Ravel' Clarice Cliff war bott koffi, sugra ha dehen - 1930.

An teylu Cliff a removas dhe Tunstall, Konteth Stafford ogas dhe Stoke-on-Trent, dhyworth ranndir Eccleshall a-dro dhe 1725. Genys veu Cliff yn Stret Meir yn terras a dreven boghosek. Hy thas, Harry Thomas Cliff, a oberas yn teudhla horn yn Tunstall. Hy mamm Ann (née Machin) a gemeras dillas rag golghi dhe geworra dhe wober an teylu. Yth esa seyth a fleghes dhedha.

Cliff eth dhe skol dyffrans dhe'n fleghes erel. Wosa skol, Cliff a wrussa godriga modrep o lymner priweyth. Benenes o mayni shoppys ober lymna an brassa rann a weythvaow Konteth Stafford, kynth yw lymna priweyth gans diwla pur danow a-lemmyn yn kenwerthel. Arvethys ens gans kynsernethow 7 bledhen.

13 bloodh, Cliff a dhallathas oberi y'n diwysyans priweyth. Hy ober kynsa o avel owrer, ow keworra linennow owr war briweyth a dhelinans hengovek. Wosa maystri henna, hi a janjyas ober dhe dhyski lymna frankleuv yn gweythva aral ha studhya art ha gravyans yn Skol Art Burslem gorthugherweyth.

Resegva a-varr

Yn 1916,Cliff a erviras remova dhe weythva A.J. Wilkinson yn Newport, Burslem, rag gwell resegva. An brassa rann a venenes yowynk y’n gweythvaow a's tevo ‘gwobrow kynserneth’, ha wosa maystri oberen, i a via gortos ynno dhe dhendyl an gober moyha. Ughelhwansek o Cliff, ha hi a dhisplegyas sleyneth yn shapya furvow ha lestri bleujyow, owra, synsi lyvrow patron ha lymna frankleuv, linenna, emaylhe ha bandya. A-varr y’n 1920ow dyghtyer delina an weythva, Jack Walker a gomendyas Cliff dhe onan a berghnogyon an weythva, Arthur Colley Austin Shorter, a dhyghtyas an kowethyans war-barth y vroder Guy. Colley Shorter o 17 bloodh kottha ages Cliff. Ev a vagas hy sleyneth ha tybyansow. Ev o demedhys mes y teuth hy gour a-dhiwedhes. Cliff a gavas attendyans arbennik gans hy harer, ha hi a wodrigas dhe Golji Art Reel yn Loundres ha dhe Baris.

An kynsa kilstamp ‘Bizarre’ printys a veu usys war briweyth Clarice Cliff ynter 1928 ha 1936 yn divers gisyow.

Cliff a gavas kynserneth aral yn gweythva A. J. Wilkinson yn 1924 (pan o 25 bloodh) avel shapyer dhe vras, mes hi a oberas ynwedh gans desinoryon an weythva John Butler ha Fred Ridgway. I a wre priweyth gis Viktorian gwithyasel – Butler re beu an desiner dres 20 bledhen erbynn henna. Wortiwedh, aswonys veu efander sleyneth Cliff'. Yn 1927 hi a gavas hy studhla hy honan yn Priweythva Newport prenys gans Shorter yn 1920. Omma gesys o Cliff dhe afina re a’n priweyth nammys yn hy fatronyow frankleuv hy honan. Rag an re ma, hi a usyas liwyow emayl war benn an gwedredh (glaze). An sewyans o liwyow splanna ages liwyow yn-dann an gwedredh.

Hi a worheras an nammow gans patronyow sempel a drihern, gis henwys 'Bizarre' gensi. An ensamplow a-varra a’s teva merk lymnys gans leuv, dell yw usys yn paynt liw gossenek, 'Bizarre by Clarice Cliff', treweythyow gans 'Newport Pottery' yn-danno. Yn revedh dhe jif gwerther an kowethyans, Ewart Oakes, gerys da o hy friweyth a-dhesempis. Lymner yowynk Gladys Scarlett a omjunyas Cliff, ha kyns pell gwrys veu kilstamp moy galwesik gans dasskrif a sinans Cliff ow leverel "Hand painted Bizarre by Clarice Cliff, Newport Pottery England".

Patron a-varr 'Original Bizarre' war bodik shap Athens

An kilstamp ma a gawsas an hanow Bizarre dhe vos usys rag pub patron gans Clarice Cliff, ytho res o dhe’n weythva henwel an ensamplow a-varr gans patronyow trihornek avel Original Bizarre.

Yn 1927 Colley Shorter (a oberas yn anserghek a’y vroder, Guy), a dhanvonas Cliff dhe Golji Reel Art yn Kensington, Loundres rag dew spys berr yn mis Meurth ha mis Me.

Wosa 1927 henwys veu Cliff rag an shapys delinys gensi war an priweyth, kepar ha sensyas bleujyow Viking Boat, kyn fe hy ober rag an weythva rekordys yn 1923–24. An shapys a-dhia ban 1929 o moy arnowydh, yn fenowgh arlinek ha mynsoniethel, gans gis o henwys Art Deco awosa. Patronyow anvateryel ha kubist a dhiskwedhas war an shapys ma, kepar ha Ravel dhyworth 1929 (patron anvateryel delen ha bleujen henwys dhyworth an komposydh). An skeusen a dhiskwedh pott koffi pigornek (Conical), bolla sugra ha dehen gans peswar troos trihornek, unn aral a dybyansow Cliff o meur gerys gans prenoryon an 1930ow. Askorrys veu Ravel ynter 1929 ha 1935.

Yn 1928 Clarice a askorras patron sempel lymnys yn frankleuv a vleujyow safron Crocus yn rudhvelyn, glas ha glasrudh, pub bleujen gwrys gans strekys afydhyansek war bann. Ena keworrys veu delyow gwyrdh pan veu synsys an darn a wartha dhe woles ha lymna linennow tanow yn-mysk an bleujyow. An patron Crocus o lymnys yn frankleuv yn tien, ha’n liwyow splann a dennas gwerthasow meur.

Patron safron Crocus

Wostalleth, yth esa dhe Clarice unn lymner yowynka a wre gweres askorra Crocus, Ethel Barrow. Mes gans arghadowyow nowydh yn 1930 selys veu ‘shoppa’ lymna diblans yn-dann leur an drehevyans may feu askorrys priweyth 'Bizarre', hag ober Ethel o dyski lymnoryon yowynk fatell wul an patron. Ugans a venenes yowynk a askorras tra vyth marnas Crocus 5½ dydh an seythen, rag brassa rann an 1930ow. Crocus o anusadow drefen y vos askorrys ha war briweyth mos, te ha koffi, ha priweyth sians, taklow gwrys rag bos royow. Yth esa lies varyans liw y’n patron, ow komprehendya Purple Crocus (1932) Blue Crocus (1935), Sungleam Crocus (1935) ha Spring Crocus. Askorrys veu hogen wosa an vresel, an darnow diwettha gans merkys Clarice Cliff veu gwrys yn 1963, kyn feu Priweythva Midwinter, a brenas an weythva, a dhurya lymna rag erghi bys dhe 1968.

Erbynn 1929, an bagas a lymnoryon Cliff a devas dhe 70 lymner yowynk, benenes dhe vras (henwys hy “mowysi Bizarre”) mes peswar mab keffrys. Lies oberer a veu kevys arta y’n 1980ow ha 1990ow, ha’ga henwyn veu rekordys y’n lyver penn kansbloodh keffrys ha’ga ober.

An weythva a askorras kevres a folenigow liw byghan (anusadow rag an termyn) kevys dhyworth an post po dhyworth an varchons. Pur sewenus o an dowlen ma, hag ober unn venen yowynk o gorra folenigow yn maylers stampys gans trigva skrifys warnedha. Y’n termyn ma, lies benen a wrussa prena priweyth der an post dhyworth lyvrow-termyn argemynna. Yth esa folennik rag pub gis, ow komprehendya Bizarre, Fantasque, Delecia, Appliqué, Inspiration, Crocus & Gayday hag erel. Yth esa folennik gwreydhek gis Appliqué ow komprehendya marnas dew batron, mes erbynn 1932 an gis Appliqué ow komprehendya 14 patron, a dhiswkedhas gallos Clarice Cliff dhe wul patronyow nowydh: gans Avignon, Windmill, Red Tree, Idyll, Palermo, Blossom, Caravan, Bird of Paradise, Etna, Garden, Eden ha Monsoon keffrys ha’n dhew wreydhek.

Patron 'Red Autumn' 1930

Gisyow Fantasque a esplegyas ynter 1928 ha 1934 gans tirwedhow a benntiow ha gwydh po patronyow anvateryel delenwelys gans Art Deco. An kynsa patron tirwedh Fantasque o Trees and House a werthas yn ta ynter 1930 bys dhe 1934. Byttegyns, patron Autumn gwrys tro’ha diwedh 1930 o an huni moyha gerys. Gwrys veu yn wreydhek yn rudh (korel), gwyrdh ha du yn 1930, mes wosa 1931 lies varyans liw a dhiskwedhas. An varyans liw moyha tanow yw rudh, kevys war black fos 13 meusva, mes an version a werthas an moyha o an huni gans gwydh yn glas, gwyrdh ha melyn.

An 1930ow

Yn 1930, Cliff a veu apoyntys Kevarwodher Art yn Priweythva Newport hag A. J. Wilkinson, an dhiw weythva a askorras hy ober. Res o dhedhi spena moy a dermyn gans Colley Shorter, ha dres termyn hemm a dhisplegyas dhe vos kerensa kudhys. An dhew a oberas yn ogas rag drehevel warneth a briweyth 'Bizarre' yn kres an Iselweyth Meur. Colley Shorter a govskrifas hanow Clarice ha re a’s shapys. Hy gallos dhe dhelina ha patronyow ha shapys o an dyffrans ynter Clarice Cliff ha delinoryon erel y'n Priweythvaow Konteth Stafford y’n termyn na. Hy shapya a-varr y’n 1920ow kres o figurys gisegys, tus, heyji ha priweyth “Davenport” bothys gans bleujyow yn 1925. Mes yn 1929 kettermyn ha dalleth delinyansow liwus kubist ha tirwedh, shapya Cliff a gemeras gis nowydh, delanwesys gans artydhyon europek kepar ha Désny, Tétard Freres, Josef Hoffmann hag erel, dell veu gwelsys gensi yn lyvrow-termyn delina ow komprehendya 'Mobilier e Décoration'.

Patronyow 1930 Melon war lester bleujyow shap 14, ha Circle Tree war bott koffi shap Eton.

Ynter 1929 ha 1935 Cliff a dhelinas lies shap, ow komprehendya Conical, Bon Jour/Biarritz, Stamford, Eton, Daffodil, ha Trieste. Yn pubonan anedha yth esa shapys priweyth te ha koffi, mes an dhew gynsa o mar veur-gerys bos gwrys balyeryow tesennow kales, krodrow sugra, bollys ha lestri bleujyow rag gwertha moy. Bon Jour a’n jeva 20 shap nowydh dres 1933, ha 10 moy yn 1934. Yth esa lies eghen a lester, bolla ha 'fancy', kepar ha’n lester Liner (gorhel bras), lester bleujyow Flower tube ha’n re yw pur danow, h.y. an lusowegyn Lido Lady ha’n ilewydhon ha donsoryon Age of Jazz.

Dres kudynnow an Iselweyth Meur, priweyth Cliff a dhurya gwertha yn ta rag prisyow ughel. Priweyth Cliff Bizarre ha Fantasque o gwerthys dre bub ran a Amerika North, Ostrali, Mordir Nowydh hag Afrika Soth, mes nyns o gwerthys yn tir meur Europa. Yn Breten Veur y hwerthys hy friweyth yn lies gwerthji a vri yn Loundres, ow komprehendya Harrods, Bon Marche, John Lewis, Peter Robinson, Selfridges, John Barker & Co., Warring & Gillow ha Gorringe's (byttegyns ny werthys priweyth Bizarre yn Woolworth’s, dell leveris gans re yn kamm).

Patronyow liwus erel, kepar ha Melon ha Circle Tree a dhiskwedhas yn 1930. Cliff a dhevisas lies fordh a varghasa an re ma, rag ensamplow diskwedhyansow lymna yn-gwerthji. Rag an re ma, Cliff a dhewisas hy lymnoresow moyha teg. Cliff ha Shorter a gavas an tybyans a dyli goraswonogyon meur an 1930ow dhe skoodhya hy ober. Gwrys veu hemma yn erthyglow lyvrow-termyn ha omdhiskwedhyansow yn gwerthjiow meur. An woraswonogyon a gomprehendyas gwarioresow Adrienne Allen, Marion Lorne ha Marie Tempest, presenter an BBC Christopher Stone, ha’n gesyer Bobby Howes. Unweyth Sir Malcolm Campbell, a dorras record tooth tir an bys hepken, a dhiskwedhas rag skoodhyans yn Ostel First Avenue, Loundres yn 1930.

Delanwes ollvysel Cliff o apert herwydh erthygel y’n Pasadena Evening Post yn Kaliforni. Skeusen y’n erthygel a’s komprehendyas ha margh 5 tros-hys gwrys yn tien a briweyth Bizarre. Y’n erthygel ma, Cliff a wrug hy devyn moyha a vri: "Nyns wra kavos sport yn ow ober evy le a artydh, ha nyns wra tus a werthfeurha gwriansow teg ha gwreydhel yn priweyth perthi own a folneth inocent."

Plat Clarice Cliff desinys gans Duncan Grant dedhys 1934

Ynter 1932 ha 1934 Cliff o kevarwodher art dhe ragdres meur a gomprehendyas ogas dhe 30 artydh an jydh (a dhallathas gans Pennsevik Kembra) rag skoodhya desin da war briweyth mos. Ensamplow a briweyth 'Artists in Industry' veu askorrys yn-dann hy kevarwodhyans, gans artydhyon kepar ha Duncan Grant, Paul Nash, Barbara Hepworth, Vanessa Bell, ha Dama Laura Knight. An ragdres 'Modern Art for the Table' veu lonchys yn Harrods, Loundres yn mis Hedra 1934. Ev a gemeras gorthyp kemysk dhyworth an poblek ha’n wask, kyn fe patronyow ha shapys Cliff ow kwertha yn ta a-der dro’n bys.

Patron Clarice Cliff 'Honolulu' war shap lester bleujyow 'Athens' a-dro dhe 1932

Patronyow Cliff yw fest gisegys yn liwyow splann, kepar ha’n patron Honolulu dhyworth 1933. Emaylys yw an gwydh yn rudh (korel), rudhvelyn ha melyn. Cliff a janjyas liwyow an gwydh dhe las ha rudhwyn dhe wul varyans aral, henwys Rudyard wosa tennvos Konteth Stafford.

Pott koffi delinys gans Clarice Cliff, rann a’n kevres 'Conical', gans an patron tanow 'Blue and White', a-dro dhe 1929.

Bri ha sewena Clarice Cliff y’n 1930ow yw kales dhe gonvedhes lemmyn, mes y’n tor’ na nyns o pana byth avel ‘benen resegva’. Ny gavas nebonan argemmynans kepar ha hemm bythkweth. Hwithrans gans studhyer PhD dhe’n wask gevos ynter 1928 ha 1936 a gavas 360 erthygel a-dro dhe Cliff ha’y ober yn lyvrow-termyn kenwerthel ha benenes, ha paperow nowodhow kenedhlek ha leel. Kettermyn, yth esa “le ages 20 daswel, pubonan marnas onan y’n wask genwerthel” a-dro dhe Susie Cooper, priwethydh ha desiner aral dhyworth Konteth Stafford.

Clarice Cliff (a-dhyghow) gans godrigoryon dhe Briweythva Newport yn 1933

Yn despit dhe’n argemmynans a veu kevys gensi , gohelus o Cliff, yn arbennek a-dherag an kamera. Y’n brassa ranna a skeusennow, yth esa hy friweyth ow kwarthevya yn erthyglow an lyvrow-termyn. Unn skeusen anformel a dhiskwedh Cliff warbarth marchons dhyworth Afrika Soth ha’y myrgh 3 bloodh. Wosa an godrik, Cliff a dhanvonas ro a sett te flogh lymnys yn hy fatron Honolulu.

Yn kres an 1930ow, discernyansow a janjyas. Meur-gerys o priweyth heb linennow kompes, kepar ha kevres My Garden a 1934 yn-rag.

Shapys erel y’n keth gis a gomprehendyas Raffia a 1937, selys war ganstellow hengovek Amerikanyon teythyek, ha lymnys gans stockys byghan a liw. Moy meur gerys o priweyth Harvest , lestri bleujyow ha bollys gans shapys ys ha froth. Wosa an vresel, marghasys veu an kevres yn feur yn Amerika North (avel England Pow Sows). Priweyth kepar ha My Garden, Raffia ha Harvest a gyf prisyow isel yn strifwerthow.

The 1940s

Yn 1940, wosa mernans Ann Shorter, gwreg Colley, ev a dhemedhas Cliff. Hi a removas dh’y ji, Chetwynd House yn Clayton, Konteth Stafford. Delinys veu an chi ‘Arts and Crafts’ yn 1899 , onan a gomyssyons a-varra pennseri bretennek Parker hag Unwin, a wrug meur a ober awosa yn ragdres Welwyn Garden City.

Dres Nessa Bresel an Bys, difennys o priweyth saw re gwynn plen yn-dann rewlys termyn-bresel. Ytho Cliff a weresas dyghtyans an priweythva yn le desina. Cliff a spenas termyn ow lowartha ha desina aga lowarth bras 4 erow yn Chetwynd House.

Wosa an vresel, kyn fe hireth treweythyow dhe Cliff rag an bledhynnyow 'Bizarre', avel gwelys yn lytherow personel dhe kowetha, hi a amyttyas bod discernyans kenwerthel rag priweyth gwithyasel. Da o gensi gwari ran le y’n weythva. Lower a askorrans wosa-bresel eth dhe Ostrali, Mordir Nowydh po Amerika North, le mayth o an discernans rag priweyth formel yn delinyansow hengovek kepar ha Tonquin a-der an patronyow ha shapys marthys a fondyas hy hanow da. Ytho ny eth dhe oberi yn awenek bythkweth awosa. Nyns eus dhe briweyth wosa-bresel talvosogeth yn strifwerthow.

Bewnans diwettha

A.J.Wilkinson ha’ga Friweythva Newport a wertha priweyth yn-dann hanow Cliff bys dhe 1964. Mernans Colley Shorter yn 1963 a gawsas Cliff dhe wertha an weythva dhe Briweythva Midwinter yn 1964 hag omdenna. Yn gwir, hi eth ha bos nebes ankarus. Byttegyns, yn mis Kevardhu 1971 ha mis Genver 1972, an kynsa diskwedhyans a briweyth Clarice Cliff a veu synsys yn Brighton, Sussex Est. Cliff a brovias kampollow rag an venegva, kyn naggho galow mos dhe’n ygeryans.

Kuntelloryon gwresek a restras an diskwedhyans, ow komprehendya Martin Battersby, skoodhyer delinyans an ‘20ow ha ‘30ow ha’n kynsa awtour dhe dhyllo lyvrow a-dro dhe’n spis na. Ena, an 23ns a vis Hedra 1972, Cliff a verwis a-dhesempis yn Chetwynd House.

Dasserghyans bern yn hy ober

An diskwedhyans ha’n lyver dyllys yn privedh yn 1976 'Clarice Cliff' gans Peter Wentworth ha Kay Johnson (Dyllansow L'Odeon) a verkyas dalleth dasserghyans meur a vern yn ober Cliff, meur-gerys gans kuntelloryon priweyth Art Deco a-dhia ban bys dhe lemmyn.

Lymnoryon gwreydhek Cliff dasunys gans fondyer CCCC Leonard Griffin yn 1986

Sett te shap BonJour yn patron Capri, 1935

Dew blat denewan yn patron Coral Firs askorrys 1933-39

Bolla tanow yn patron Cornwall, gelwys Moonlight po Devon yn liwyow erel

Plat tenewan yn patron tanow Double V

Sett saworennow yn Forest Glen

Kroder sugra ha podrik yn patron Lorna

Kroder holan yn patron Luxor

Plat tenewan yn patron tanow Sunray

Yn 1982 fondys veu an Clarice Cliff Collectors Club gwreydhek rag skoodhya hi ha’y ober a-der dro’n bys. Fondyer an kowethas re wovynsa y’n Staffordshire Evening Sentinel dhe nebonan a oberas gans Cliff kestava ganso. Pes da o pan veu kevys 28 a oberoryon kyns. Fest da o gans an lymnoryon kyns (gelwys an 'Bizarre girls' yn kres an 1970ow ha 1980ow a-varr hwath) bos bern dhe dus y’n priweyth lymnys gansa 50 bledhen agynsow. I eth dhe guntellesow an kowethas, diskwedha yn lies towlen pellwolok ha radio a-dro dhe Cliff, ha kevranna dhe lies lyver orth hy thochya. Aga hovyow veu rekordys yn CCCC Reviews a-dhia 1982 bys dhe 2004. Kuntellesow ha diskwedhyansow veu synsys yn Breten Veur, Amerika North, Ostrali ha Mordir Nowydh.

Ynter 1987 ha 1997, aga huntellesow yn Stoke-on-Trent a vysytyas shoppa lymna koth Bizarre ryb an dowrgleudh yn Newport, Burslem, y’n termyn na an unnik drehevyans gesys war an savla. Yn trist diswrys veu an drehevyans gans Wedgwood yn 1997. Gwerthys veu an tir rag anedhyansow.

Yn 1985 askorrys veu kevres a dharnow yn-dann an title The Bizarre Collection, gans merk rag "Royal Staffordshire Pottery by Clarice Cliff", ha marghasys gans Priweythva Midwinter. Lymnys veu pub darn frankleuv, yn dyffrans dhe askorransow diwettha Wedgwood. I a usyas an desinyow ha methodys gwreydhel (a-der an kroder sugra pigornek Crocus). Askorrys vons y’n keth drehevyans avel askorrans gwreydhel Priweythva Newport.

An tri chyf desin askorrys o Honolulu war flester bleujyow 12-meusva Mei Ping, Summerhouse war blat fos 13-meusva ha versyon splann a Umbrellas and Rain war volla pigornek. Merkys esons gans niver "85" byghan stampys rag an vledhen a wrians. Yth esa dewis a hwegh kroder sugra pigornek ynwedh, arta lymnys gans leuv, a-der Crocus a veu lithograffys. Kyn kwrello purydhyon skornya an darnow 30 bledhen awosa, ymons I daswriansow pur ewn a’n re gwreydhel. Ymons I ow tos ha bos meur-gerys lemmyn ha kuntelloryon a werthveurha darnow a nas da ha pris resnadow.

Kadon gorunyansow a omsewyas dhe berghenogaeth Wedgwood a hanow Clarice Cliff, hag ynter 1992 dhe 2002 i a askorras niver a dhaswriansow darnow a'n 1930ow ynwedh. Gwrys veu an re ma dhe nas ughel, hag askorrys vons rag gwertha dhe guntelloryon nag allsons kavos (po affordya) an darnow gwreydhel moyha splann.

An kynsa darnow askorrys a gomprehendyas jarrik jynjyber yn House and Bridge, lester bleujyow meur shap 14 yn Solitude, pott te, sugra ha leth yn shap Stamford yn Pink Roof Cottage, bolla pigornek yn Tennis, ha plat fos yn Lightning. Ynter 1996 ha 2002 darnow veu gwrys rag eseli CCCC, ha rag gwertha yn gwerthjiow Wedgwood ynwedh. Lettys veu askorrans a’n darnow lymnys gans leuv yn 2002, mes priweyth gans patronyow printys a veu gwrys yn mynsow moy gans Wedgwood a 1996 a-rag.

Ny dal kemyska an daswriansow gans fugyansow art. Merkys yn apert yw an daswriansow gans 'Wedgwood Clarice Cliff'.

Gre avel artydh

Yn kres an 1990ow gre Cliff avel artydh posek a’y oos veu afydhys pan veu komprehendys Cliff'yn lyvrow kampollans kesgwlasek meur, rag ensample Dictionary of Art gan Dyllansow Macmillan, ha Allgemeines Künstlerlexikon gans K. G. Saur Verlag.

Ober an CCCC dheuth dhe ughelboynt yn diskwedhyans penn kansbloodh Clarice Cliff, the Art of Bizarre yn Gwithti Wedgwood, Barlaston, Stoke-on-Trent. Lemmyn synsys yw an klub warlinen wosa 26 bledhen a brevyans. Ny dylir y gemyska gans kowethyans a wrug usya an keth hanow wosa 2001 (wosa kovskrifa an hanow yn 1997). An CCCC o kussulyer rag towlen drama BBC Radyo 4 'The Bizarre Girl', skrifys gans Lizzie Slater. Deskrifys veu an dowlen avel "drama awennus a wra hwithra yskynnans Clarice Cliff a leur an gwerthji dhe Gevarwodher Kowethyans Art – ow tiskwedhes fatell wrug benen renkas oberi a gomendyas art arnowydh dhe'n bobel." Darlesys veu an drama yn mis Kevardhu 2000.

Kuntel Clarice

Yn 2002 Peter Wentworth-Sheilds ha Kay Johnson, awtours an lyver 'Clarice Cliff' gwreydhel a 1976, a dhehwelas dhe Vreten Veur rag arethya yn kuntelles an CCCC yn Christie's, Loundres. I a dheskrifas dydhyow a-varr ow kuntel hi friweyth pan veu kost aga frenas kynsa "lester bleujyow shap Athens, patron Summerhouse rag 7 sols ha 6 diner, 35 diner a-lemmyn ". Peter a gowsas orth Cliff der an pellgowser, mes hi a naghas keswel. I a leveris aga bos owth oberi rag Stanley Kubrick pan skrifsons aga lyver. Kay o skoodhyer personel dhe Kubrick, hag avel desiner desedhva Peter a afinas stevel yn fylm 'A Clockwork Orange' gans tirwedhow Cliff.

Kesunyansow a shapys ha patronyow tanow a denn prisyow pur ughel yn strifwerthow. Pris record an bys rag darn a Clarice Cliff yw synsys gans Christie's, Loundres, a werthas plack fos 18 meusva yn patron May Avenue rag £39,500 yn 2004. Yn skon wosa henna an keth chi strifwerth a werthas lester bleujyow 8 meusva yn Sunspots rag £20,000.

Lester bleujyow shap 369 Red Autumn tanow veu gwerthys rag £4900 yn strifwerth Fielding's, Stourbridge, Krestiryow West, ha strifwerth Woolley ha Wallis yn Karsalek (Salisbury) a werthas lester byghan 3 meusva yn Café (usys avel sampel gwerther y’n 1930ow) rag £3000. Yn mis Me 2009 plack fos 18 meusva yn patron May Avenue a werthas rag £20,500 yn strifwerth Fielding’s.

Yn 2009 Will Farmer a dowlen BBC, Antiques Roadshow hag eseli an Clarice Cliff Collectors Club a dhislennas teyr leghen kov. An re ma o war hy thyller genesigeth, Meir Street, Tunstall, hy nessa chi yn Stret Edwards, Tunstall ha savla Priweythva Newport ryb an dowrgleudh yn Burslem le may veu afinys hy friweyth Bizarre. I a omdhiskwedhas yn towlen arbennek Antiques Roadshow yn mis Kevardhu an keth bledhen.

Yn mis Gwynngala 2009 an Gwithti Viktoria hag Albert yn Loundres a ygoras y 'New Ceramics Galleries' ow komprehendya priweyth Cliff'. "Y fydh diw stevel ow tiskwedhes kuntellesow 20ves kansvledhen. Onan a vynn diskwedhes priweyth gwrys yn gweythjiow, ow komprehendya darnow gwrys gans desinoryon kepar ha Susie Cooper ha Clarice Cliff" yn medh aga derivas dhe'n wask.