David Balhatchet

Kernowegor o Dr. David John Balhatchet (23 Ebrel 1926 - 22 Ebrel 2001), pur weythresek yn degvledhen an 1990ow. Genys veu yn Southall, Middlesex, yn 1926 dhe John Balhatchet ha Maria (née Mallet), an eyl a dhew flogh. Konstabel y'n Kreslu Metropolitan o y das. An teylu a removas dhe Gernow le mayth o y das gwithyas chi ostyans yn Porthkehodhon, ogas dhe Lannwedhenek. Ev eth dhe skol gynsa privedh ha skol eylradh an wlas yn Kernow. Ev a gavas skolorieth dhe Bennskol Rysoghen (Kolji Wadham) le may hwrug furvya Kowethas Kernewek warbarth hag erel, kepar ha Richard Jenkin. Yn 1951 omjunya a wra ev Kolji St Mary, Twickenham, rann a Bennskol Loundres, ow tyski Frynkek. Apoyntys veu avel penn an asran Frynkek yn 1975. Ev a gaves peder gradh gans Pennskol Rysoghen, bachelorieth (BA) yn 1949, BLitt yn 1952, MLitt yn 1980 hag ow kwaynya DPhil dhyworth an keth pennskol yn 1988.

Yn 1950 ev a dhemedhis Mary Foss (1925-1980), mes hi a verwis yn 1980. Wosa y eyl dhemedhyans yn 1982 dhe Delysia Hogan (1930 - ) ev a gemeras omdennans a-varr, ow remova dhe Sussex. Kentrynnys veu dhe dhyski Kernewek gans Dorothy Richards yn 1988, ow tyski dre Gernewek Dre Lyther. Ev a sewenis yn y apposyansow yn 1992. Ev a veu berdys an keth bledhen yn-dann an hanow bardhek Map Frynkes. Ev a wrug profredya lies lyver Kernewek, ow komprehendya A Grammar of Modern Cornish gans Wella Brown ha hwedhlow berr Jowann Richards.

Ev a verwis 22 Ebrel 2001 yn Brighton wosa kleves berr.