Edhen an kwyllennow

Edhen an kwyllennow
Edhen an kwyllennow (Sagittarius serpentarius”) (Miller, 1758)
Klassans bewoniethek
Gwlaskor:	Animalia
Fylum:	Chordata
Klass:	Aves
Urdh:	Accipitriformes
Teylu:	Sagittariidae
Kinda:	Sagittarius (Hermann, 1783)
Gwrandrans edhen an kwyllennow

Edhen an kwyllennow (Sagittarius serpentarius) yw edhen breydhus meur hag a vyw war an tir rag an brassa rann a'n termyn. Endemek yw dhe Afrika, kevys y'n gwelstiryow gwastas ha savanna yn Afrika dhe'n dhyghow a'n Sahara. Esel a'n Accipitriformes, hag a gomprehend lies edhen breydhus aral kepar ha skowles, hokys, vulturys ha helghyoryon, desedhys yw yn hy theylu hy honan, Sagittariidae.

Pur aswonadow yw edhen an kwyllennow avel edhen veur gans korf kepar hag er war dhiwar kepar ha garan. Ughelder an edhen yw kemmys ha 1.3 m. An gorreydh ha benenreydh yw hevelep yn aga semlant. Yma dhe'n tevesik enep dibluven rudh/rudhvelyn ha pluv loos, gans krib dowl ha diwvordhos du.

Parya a hwer neb termyn an vledhen, mes holergh y'n seson segh dell yw usys. Drehevys yw neyth war benn gwedhen dhreynek, akasya yn fenowgh, ha dedhwys yw ynter onan ha tri oy. Gorys yw an oyow wosa 45 dydh. Mars eus boos lowr, an tri a yll treusvewa, hag i a wra gasa an neyth wosa 3 mis. Edhen an kwyllennow a helgh ha kachya preydh war an tir, yn fenowgh orth stankya war fethesigow rag aga ladha. Hwesker ha mellkeynogyon byghan yw hy boos dell yw usys. Yn dhespit dhe'n hwedhlow, serf yw debrys marnas treweythyow, kyn hwrello aga preydh komprehendya kobraow ha nadres.

Nyns yns i ydhyn kowethasek marnas kesparow ha'ga fleghes. Yn fenowgh kesparow a helgh war-barth. An brassa rann a'n jydh yw spenys war an tir, owth helghya. Hys bewnans y'n gwyls yw 10 - 15 bledhen. Ydhyn an kwyllennow a furv parow tiredhek, gans tiredh efan a 50km².

Kyn hwer edhen a kwyllennow dres gwandrans efan, hy foblans a wra kodha, dell hevel, martesen drefen chanj yn hy bewva. Klassys yw an eghen avel peryllys ytho.

• 
  Penn edhen an kwyllennow
• 
  Lost hir edhen an kwyllennow
• 
  Edhen an kwyllennow ow neyja
• 
  Edhen a kwyllennow ow tybri pedrevan