Ernest Edwin Morton Nance

Ynjynor, bardh ha prydydh Kernewek o Ernest Edwin Morton Nance, (28 Gortheren 1909 - 8 Gortheren 2002). Aswonys ova ynwedh avel "Tony".

Brith kenedhlek Kernow, desinys gans E.E.Morton Nance

Genys veu Morton Nance yn 1909 yn Kardydh, Kembra dhe Alwyn Morton Nance ha Kathleen Mary née Mollard. Ev o an tressa mab ha pympves flogh a hwegh dhedha. Y das o broder kottha Robert Morton Nance, bardh meur ha skolheyk Kernewek. Y teuth E.E.Morton Nance ha bos ynjynor, owth oberi avel isynjynor yn Gorsav Diwiver Bosvenegh. Berdhys veu avel esel Gorsedh Kernow yn 1934 gans an hanow bardhek Gwas Gwethnok. Esel gweythresek o a Dyr ha Tavas, hag ev a vedha redya dyskansow yn servisyow eglos y'n 1930ow. Morton Nance o kannas an Orsedh ynter 1982 ha 1988.

Yn 1936 ev a dhemedhis Edith Alice Bennett yn Treavon, Lannwedhenek. I a gavas tri flogh.

Yth esa bern arbennik dhe Morton Nance yn brith kernewek. Ev a skrifas kan a-dro dhodho An Brythen Kernewek. A-dhia 1902 pan wiskas L.C.R. Duncombe-Jewell brith yn Esedhvos Bangor, du o liw an brith, Y'n 1960ow, ev ha Donald Rawe a dhesinyas dew vrith nowydh, ow fondya kowethyans gwertha brith kernewek. Mab Morton Nance, Peter, a venester an kowethyans lemmyn.