Gilbert Hunter Doble

Pronter Anglikan a Gernow o Gilbert Hunter Doble (26 Du 1880 – 15 Ebrel 1945). Ev yw moyha aswonnys rag y ober skolheygel war sens Kernow, Kembra ha Breten Vyghan.

Gilbert Hunter Doble
Genys	26 Du 1880  Pennsans
Mernans	15 Ebrel 1945
Kenedhlogeth	Ruvaneth Unys, Ruvaneth Unys a Vreten Veur hag Iwerdhon
Alma mater	Exeter College Ely Theological College
Galwesigeth	istorior, Anglican priest
Eseleth	Gorsedh Kernow

Genys veu yn Pennsans, Kernow hag adhyskys yn Kolji Karesk, Rysoghen ha Kolji Duwoniethel Ely. Y das, John Medley Doble, a gevrennas y vern ow tochya hendhyskonieth ha studhyansow leel gans y vebyon. Ordenys veu yn 1907. Ev a veu skoodhyer kurat yn niver a dylleryow yn Kernow ha Pow Sows, kurat Resrudh hag ena pronter Egloswendron. Yn 1935, gwrys ev avel Chenon enorys yn Penneglos Truru. Chenon Doble a besyas gans studhyans dres y vewnans a Vreten ha Breten Vyghan keltek, ow kwaynya bri a-dreus Europa. Ev a skrifas yn feur ow tochya sens Kernow, Kembra ha Breten Vyghan, ow kreuni war daselvenna bewskrifow an Osow Kres. Frooth y hwithrans a veu dyllys ynter 1923 ha 1945 avel kuntel a 48 lyvryn lymnys aswonnys avel an kevres 'Cornish Saints'. Wosa 1928 i a gomprehendyas menegyansow istorek gans Charles Henderson. Meur aga tennvos o an lyvrynnow, hag yn apert i a veu sewennus gans an poblek. Bys dhe dhyllans ‘Saints of Cornwall’ gans Orme yn 2000, i o an oberyow moyha kowal, skolheygel ha lel war an desten. Treylys veu 11 dhe'n lyha a’y lyvrynnow dhe Frynkek, drefen bos lies sans gordhys yn Breten Vyghan ynwedh. An Deyn ha Chapter Truru a dhyllas kuntel a’n kevres yn hwegh lyver golegys gans Donald Attwater 1960-70. Y’n gwettha prys nyns yw menegyansow istorek Henderson ha’n lymnansow komprehendys ynna. Ev a dhyllas studhyansow war lies sans marnas yn Kernow. Eyl-dhyllys veu y ober war niver a sens kembrek, Dyfrig, Illtud, Paulinus Aurelianus, Teilo hag Oudoceus, avel lyver golegys gans D. Simon Evans yn-dann an titel 'Lives of the Welsh Saints' (1971).

Bedh Gilbert Hunter Doble yn Korflan Egloswendron

Ynwedh Doble a guntellas lien gwerin ha kanow gwerin kernewek, rann anodho eth dh’y lyvrynnow. Yn 1928 ev a veu berdhys yn-dann an hanow bardhek Gwas Gwendron yn Treorci, Kembra, onan a eth a Gernow berdhys rag pareusi gwruthyl Gorsedh Kernow an vledhen wosa henna. Ev a dhegemmeras medal Jenner Fondyans Riel Kernow. Drefen ev, synsys veu an performyans kynsa yn Metheven 1924 a Vewnans Meriasek a-dhia an Dasformyans (yn treylyans Sowsnek). A-dhia an eur na synsys veu lies performyans gormelys y’n yeth Kernewek ynwedh. Hwithrans Doble a ledyas dhe dhasserghyans hwarvedhyans Hal-an-Tow yn bledhynnyek pub Dydh Dons Feri yn Hellys.

Kudynnow

Kudyn a hwer orth gul devnydh a ober Doble o y falladow dhe grysi dell alsa benenes hembronk kemenethow po travalya. Ev a grysis an venegh a skrifas a-dro dhedha dhe wul kammgemeryans. Ev a assayas ewnhe po restra dre janjya nebes sansesow dhe vos gwer hag unya sens dell esa owth oberi ogas an eyl dh’y gila. Unn ensampel yw dell gampollas bos dew sans gelwys Non, onan anedha benen a dhinythas Dewi Sans ha’n aral den a viajyas dhe fondya kemenethow.

Mernans

Doble a verwis yn Hellys 15 Ebrel 1945. Ynkleudhys veu yn korflan Egloswendron. Synsys yw y guntel a lyvrow, ow komprehendya dydhlyvrow dornskrif, yn Lyverva Courtney, Gwithti Riel Kernow, Truru.