Hilda Ivall

Hilda Annie Ivall (1 Est 1910 - 3 Du 1999) o artydh, bardh ha prydydh Kernewek.

Genys veu yn 1910 yn Hampstead, Loundres, an eyl a beswar flogh dhe William Charles Ivall (1883-1968) ha’y wrek Florence Bessie neé Endean (1885-1960). Klorek o William Ivall yn kowethyans devnydhyow tardha Nobel. Wosa avonsyans ev a dheuth ha bos akontydh y'n keth negys. Ev a worfennas y resegva avel kevarwodher menyster dhe onan a gowethyansow ICI.

Kernowes o mamm Hilda, hag ytho an teylu a vysytya Kernow yn fenowgh.

Yth eth Hilda hy honan dhe oberi yn ICI ha kyns ha dres Nessa Bresel an Bys. Yn 1939 hi o trigys yn Slough. Wosa an vresel hi eth dhe Gernow, ow menystra Kaffi Seagull war benn alsyow Breanek yn-mysk hwelyow erel. Yn 1959 hi o mamm meyni yn chi tus goth yn Tiverton, Dewnens. A-dhia 1960 yn-rag res o dhedhi gwitha onan a’y breder yn Barnstaple. Wosa y vernans yn 1968 hi a removas dhe Vreanek arta.

Yn 1971 hi a veu berdhys gans an hanow bardhek Morvran . Hi a skrifas bardhonieth yn Kernewek ha Sowsnek, kepar ha Peder can ver ha Nebes Gwersyow.

Yth esa bern dhedhi a lymna, dre vras lymnansow anvateryel selys war liwyow ha furvow monyow Kernow. Dell yw usys hi a oberas gans kanvasow meur ha liwyow oyl gorrys gans kollell estyllik, mes yn hy bledhynnyow diwettha hi a arbennegas yn dowrliwyow a vleujennow. Hi a omdhiskwedhyas yn leel yn fenowgh, ha dres an mor hogen, r.e. y’n Biennale yn Venis. War unn termyn hi o kaderyer Kowetha Artys Porthpyran. Yth esa bern dhedhi yn priweyth, bardhonieth ha gwari piano, tollgorn hag organ. Hi a verwis yn 1999.