Linen Arvordiryow Atlantek

Linen hyns-horn kemeneth 20³⁄₄ mildir (33km) yn Kernow yw an Linen Arvordiryow Atlantek. An hyns-horn a bon a dhyworth an Mor Predennek yn Porth dhe'n Keynvor Atlantek yn Tewynblustri.

Hyns

An Linen Arvordiryow Atlantek a dhalleth dhe Worsav Porth, ple'ma junyans gans an Penn-Hyns-horn Kernow. Ow tiberth an gorsav, res yw dhe'n linen treylya war warr ogasti 180 gradh dhe junya hyns an hen Hyns-Horn Monow Kernow (HMK) ogas dhe'n hen worsav yn Lanndreth. An linen a hol hyns an HMK rag remenant an viaj.

A-dhyworth Lanndreth, an HMK a wrug devnydh hyns an hen Dhowrgleduh Porth, a veu byldyes dhe servya an Bal Konsolow Fowydh, mar bell avel y dhiwedh dhe Velyn Pons. Omma an linen a wra entra an Nans Logsulyan, ple'ma lower a remenantys diwysyansek eus Ertachva an Bys.

Ogas dhe worsav Logsulyan an hyns-horn a bass an Bonsfordh Treffry, ponsfordh hyns-horn ha dowrbons istorek dew borpos esa gwrys yn 1844 a garyas penn-hyns an Hensi-Tram Treffry.

Tren pri China y'n Nans Logsulyan.

Wosa Logsulyan, an linen a bass lower a seghoryon ha gweythyow pri China koth hag arnowydh, kyn ev dhe bassya an gorsavow yn Karnrosveur ha Tregarrek.

Yntra Tregarrek ha Fordh Sen Kolom, an linen a dreus Gwithva Natur Woon Gors. Ev re beu lower a dhroglammow gans an opns a dreus an fordh A30. Y fia plottys dhe dhidreylya'n hyns-horn rag may talathsa dhe worsav Sen Ostell ha holya linen gwara yn-unnik an hen Hyns-horn Diberth Tewyn Blustri ha Kernow dhe eyljunya hyns an linen lemmyn dhe Dredhinas. An plott ma re beu droppyes lemmyn meur ras a hyns nowyth an fordh a avod an pons ha gwithva natur.

Wosa hi dhe bassya Tregarrik, an linen a bass Gorsav Goonkoyntrel kyn ow trehedhes Gorsav Tewynblustri.

Kledhrennow an gemeneth

An Linen Arvordiryow Atlantek yw onan a'n hensi-horn eus skoodhyes gans an Keskowethyans Kledhrennow Dewnens ha Kernow. Yma hyns-korev-kledhrennow dhe'n linen esa lonchyes yn 2005, yma 15 diwotti a-hys an hyns-horn rag trethysi dh'aga godriga.

Gorsavow

Ottomma rol a worsavow war an Linen Arvordiryow Atlantek.

Oberyans

Tren dhe worsav Tewynblustri.

Unn hyns yw an linen yntra Lanndreth ha Tewynblustri. Yma loup-passya ogas dhe Garnrosveur, a veu gwrys rag trenow pri China war aga fordh dhe warth gwara Goongrug. Y'n jydh hedhyw, devnydhyes yw an loup rag trenow hav dhe bassya y gila. An loup a wra devnydh a sinellow semafor.

Gonisyow Trethysi

Hyns-horn Bras an West a ober gonisyow trethysi leel. War benneythennyow y'n hav pub tren yw eylworrys gans kemmysk a drenow Hyns-horn Bras an West a-dhyworth Loundres Paddington ha trenow CrossCountry dhyworth Pow Sows North. HBW a henow lower a'y drenow dhyworth Loundres Ekspres an Arvordiryow Atlantek. Nebes a'n trenow dy' Sadorn yw gonisyow ekspres gwir a hedh orth Porth, Aberplymm, Karesk Sen Dewi ha Loundres Paddington yn-unnik.

Gonisyow Gwara

Tren Tooth Bras ow sevel dhe Worsav Tewynblustri.

Diwedh est an hyns-horn bys dhe Dhibarthva Goongrug a wel lower a drenow gwara eus oberys gans DB Schenker. Hyns-horn skorren berr a jun an linen yn Lanndreth gans an porth yn Porth.

Droglammow

War 25ves mis Me 1991, kensa tren an jydh dhyworth Tewynblustri dhe Loundres a dheuth dhyworth an kledhrennow y'n Nans Logsulyan. Unses Tren Tooth Bras o an tren. An trethysi veu movyes dhe'n karr-power a-dhelergh esa anbaryes ha drehedhas dhe worsav Logsulyan, ple gyllas an trethysi pesya war aga viaj yn kerri.

Glawas poos war an 30ves mis Kevardhu 2006 a gawsyas tirslynk ogas dhe Lanndreth, a lettyas an linen. Gonisyow kyttrin eylworrans veu devnydhyes erna eylygeris an hyns-horn war 8ves mis Genver 2007.

War 12ves mis Metheven 2007, tren a gesskwattyas gans karr war dreusva dhe Japel ogas dhe Dewynblustri. Treusva gans golow hag alarm o hi, mes nyns esa lettys dhedhi. Shyndys veu lewyer an karr, mes nagonan war an tren veu shyndys.

Gweller ynwedh

Keskowethyans Kledhrennow Dewnens ha Kernow

Kevrennow a-ves

Great Scenic Railways in Devon and Cornwall (yn Sowsnek).
The Focal Group (yn Sowsnek).