Myghal Palmer
Michael Charles Palmer, po Myghal Palmer (22 Hwevrer 1936 – 20 Hedra 2005) o novelydh y’n yeth Kernewek.
Genys veu Myghal Palmer yn Porth Dewnans yn 1936, an yowynkka a dhew flogh dhe Reginald W L Palmer hag Elizabeth M L Grose. Y das o klorek arghantti. Adhyskys veu yn Kolji Aberplymm, ow kwaynya an Pewas Sowsnek. Ev a warias yn lies drama radyo dhe’n BBC. Rag servis kenedhlek ev a viajyas dhe Irak, Jordan ha Koberenys. Awosa ev a viajyas dhe lies rann a’n bys gans y deylu.
Yth eth dhe Golji Pennvro yn Pennskol Rysoghen rag studhya lagha. Mes wosa ev dha asa Rysoghen, ev a sewyas y das dhe oberi yn Arghantti Lloyds. An brassa rann a’n termyn ev a oberi yn Bristol ha Taunton, mayth o trigys war-barth ha'y wrek, Margaret ha’ga diw vyrgh. Da o ganso kerdhes, hag ev a gerdhes lies trolergh hir ow komprehendya an Hyns an Pennines ha Trolergh Arvor Kernow.
Yth esa bern dhodho ow tochya y aghskrif, ha’y wreydhyow Kernewek a gentrynnas ev dhe dhyski Kernewek. Ev a dhallathas dyski Kernewek dre gors kesskrifans ‘Kernewek Dre Lyther’. Enorys veu avel bardh an Orsedh der apposyans yn 1986 yn Lannwedhenek gans an hanow bardhek Perghyryn.
Myghal Palmer a skrifas peswar a’n pymp novel kynsa skrifys yn Kernewek. Ev a skrifas lies hwedhel berr hag erthyglow rag lyvrow termyn ynwedh, keffrys ha nebes bardhonieth. Pur dheskrifus o y skrifow, didhanus treweythyow, trist po euthyk termynyow erel. Ev a waynyas pewasow an orsedh keniver tro, y feu govynnys dhodho sevel orth kesstrifa rag ri chons dhe dus erel.
Palmer ynwedh o gwarier naturel ha gallosek, a dhyskas y eryow yn ferfydh. Ev o kuv ha gweresek dhe dhyskoryon erel. Ev o esel a’n bagas 'Agan Tavas'.
Ev a verwis a ganker 20 Hedra 2005.
Rol a nebes gwriansow gans Myghal Palmer golegi
Skrifys yn Kernewek Unys marnas Dyvroans (Unys Amendys) po leverys dhe'n kontrari.
| Bledhen | Hanow | ISBN | Furv |
|---|---|---|---|
| 1986 | Enys Ancow | 0 9535975 1 2 | Hwedhel berr. Dyllans kynsa gans Kernewek Dre Lyther. Nessa ha tressa dyllans gans Spyrys a Gernow (1999 ha 2002). |
| 1986 | An Tylu Kellys | Hwedhel berr (dyllys warbarth ha 'Donyert map Donyert' gans Ray Edwards gans Kernewek Dre Lyther) | |
| 1989 | Jory | 978 0 9548451 6 2 | Prederys yw gans lies Kerneweger y vos an gwella novel skrifys yn Kernewek. Wosa mernans y gerens, Jory a wayas dhe driga gans y ewnter. Kynsa dyllans gans Gwask Bryn Frys yn 1989 ha 1993. peswora dyllans gans Spyrys a Gernow yn 2008. |
| 1993 | Sterlester dhe'n Norvys Noweth | 10 - 0907064930 | Eyl-dyllys yn 2004 (Rann gynsa 'Godros') |
| 1993 | Hwedhlow Euthekter | 0-907064-34-5 | Hwedhlow berr |
| 1993 | Moy Hwedhlow Euthekter | 0-907064-40-X | Hwedhlow berr, dyllys gans Kesva an Taves Kernewek yn Kernewek Kemmyn |
| 1998 | Dyvroans (Ystory Tylu Kernewek) | Novel - stori den bal a Gernow a dhyvroas dhe Ostrali. Selyes war istori teylu Myghal y honan ha dyllys gans Spyrys a Gernow | |
| 1999 | An Kaskyrgh Diwettha | 1-899342-41-9 | Dyllys gans Kowethas an Yeth Kernewek yn Kernewek Kemmyn. Eyl-dyllys yn 2004 (Nessa rann 'Godros' - avel 'An Caskergh Dewetha') |
| 2001 | Rebellyans | 978 0 9564234 0 5 | Novel - fuglien skiens. Daspryntys yn 2011 gans Spyrys a Gernow |
| 2002 | An Gador Wak | Hwedhel berr: komprehendys yn Hwedhlow a-dhiworth An Orsedh. Dyllys gans Kowethas an Yeth Kernewek yn 2009 ha daspryntys yn 2013. | |
| 2003 | Parys Of Vy | Hwedhel berr: komprehendys yn Hwedhlow a-dhiworth An Orsedh. Dyllys gans Kowethas an Yeth Kernewek yn 2009 ha daspryntys yn 2013. | |
| 2004 | Godros | 0 9548451 0 2 | Novel - Lyver fantasi skiens. Dyllys gans Spyrys a Gernow |
| 2009 | Tu aral an Norvys ha Whedhlow Erel | 978 0 9548451 7 9 | Pymp hwedhel berr gans Myghal Palmer ha dew gans Heather Ashworth. Dyllys gans Spyrys a Gernow. |
| 2009 | Hwedhlow a-dhiworth An Orsedh | 978 1 899342 61 7 | Ev a gevrannas dew hwedhel berr, An Gador Wak ha Parys Of Vy |
| 2010 | Whethlow wosa Tewlder | 978 0 9548451 9 3 | Naw hwedhel berr. Dyllys gans Spyrys a Gernow. |
| 2016 | Whethlow an mor | 0-9548451-1-0 | 5 hwedhel berr |