Eddie Climo

Hedley Forbes Climo (1947 – 17 Gwynngala 2016), aswonnys avel Eddie Climo, o awtour ha treylyer a lyvrow Kernewek. Ev o mab kottha dhe Hedley Climo a Vosvenegh hag Isobel (Sybil) Duthie a dre Thurso yn Alban. Yth esa unn broder dhodho, Laurence (Laurie). Y das o sodhek y’n Ynjynoryon Riel (ha prisner bresel yn Nihon peder bledhen yn Nessa Bresel an Bys) hag Eddie ha’y vroder a’n sewyas dhe lies rann a’n bys yn aga flogholeth.

Ev a studhyas yn Kembra, ow tyski Kembrek kettermyn , hag ena Albanek. Wosa niver a vledhynnyow ev a dhyskas Kernewek ynwedh. Yn 1986 ev a dhemedhis Jacqueline Roulston. I a gavas dew vab, Seoras ha Tearlaich (Charlie), ha’n teylu a’s maga yn Albanek. Wosa oberi ha triga yn Aberplymm rag termyn ev a removas arta dhe ji an teylu yn Taunton. Ev o kowser freth a Gernewek, ha kyn fe trigys yn Taunton, lowen o dhe’y usya dre Skype po iChat.

Eddie o skoodhyer Kernewek Unys, system gwiw rag an Dasserghyans, orth y vrys, kyn aswoni bos edhom a nebes chanjys dhodho yn golow studhyansow nowydh.

Yn 2010, Climo a dhallathas kowethyans dyllo war worholeth, ‘Gwask an Orlewen’ y hanow. Ev a dhyllas niver a lyvrow a nas ughel, po tekstow an Dasserghyans a-varr mes a brynt po treylyansow dhe Gernewek mes a wirbryntans. Kyns y vernans re a-varr yn 2016, dyllys veu moy ages 50 a ditlow. An titlow a gomprehendas bondys delinys kepar ha 'Popeye' ha 'Gordhen', niver a lyvrow Beatrix Potter kepar ha 'Gwywer Knofennyk' ha 'Tregher Kerlew', treylyansow novelow kepar ha 'Tarosvan Canterville' hag 'An Cawr Crefny' gans Oscar Wilde ha 'Drolla Doctour Dolittle' gans Hugh Lofting. Tekstow an Dasserghynas a gomprehendas 'Trystan hag Ysolt' gans A.S.D. Smith ha David Watkins, hag 'Yn Kernewek - Lavar E' gans Edwin Chirgwin.

Yn revedh, ny waynyas unn vyth a’n lyvrow Pewas Holyer an Gof kyn fedha Len Truran y honan prout a’n ober gwrys gans Climo. Yn 2015 y lyver 'Drollys Gys-Dons' o an kynsa dhe waynya an Pewas Perghyryn.

Y vroder, Laurie, a dhyskas Kernewek ynwedh, hag a veu bardhys yn 2000 gans an hanow bardhek Scryfer Medhelwyth.