Legh

Ensampel a	men
Klass	karrek dreusfurvek, karrek shistek
	Restrennow kelmys war Gemmyn Wikimedia

Legh yw karrek dreusfurvek gans gwrysow munys, ha gwiasedh folsys. Devedhys yw dhyworth karrek wodhosek avel kyllas komposys a bri po lusow loskvenydhyek dre dreusfurvyans gradh isel, hemm yw, gwaskedh ha tommder temprys. Nyns eus res dhe'n folsans sewya patron an gweliow godhosek gwreydhek drefen an treusfurvyans dhe ri patronyow nowydh dhe'n garrek. Shist yw eghen a garrek dreusfurvek gans folsans ynwedh.

Possybyl yw dhe usya an folsans dhe askorra platys tanow a garrek, usys a-dhia termyn hir rag tohow po leuryow.

Legh a hwer yn varyans a liwyow: loos yw pur gemmyn, mes purpur, glas ha glaswyrdh a hwer yn Kembra north, gwyrdh yn Pow an Lynnyn ha glas/loos yw legh Delyow Boll yn Kernow.

Usyes

Usys yw legh ti yn lies pow, kynth yw prileghennow moy meurgerys yn nebes ranndiryow. Y hyllir usya legh possa rag leuryow (yn mes hag a-ji dhe'n chi). Usys yns i ynwedh rag arvwisk po kroghen drehevyans, hag yn Kembra yma drehevyansow kowal a legh. Legh tew yw usys rag mosow snooker ha mosow arbrovjiow, le mayth yw y dhefens dhe janjys tempredh ha kymygennow dhe les. Y'n termyn eus passyes usys o yn skolyow rag bordhow du ha legh skrifa.

Tylleryow

An brassa rann a legh hedhyw a dheu dhyworth Spayn, mes Kembra, Kernow (Delyow Boll), Pow an Lynnyn, hag Alban west o posek y'n termyn usi passyes. Brasil, China ha'n Statys Unys (lies mengleudhyer a dhivroas a Gembra dhe Vermont, Virjynni ha Mayn y'n 19ves kansvledhen) yw posek ynwedh hedhyw.

Apoyntys veu ranndir legh Kembra north avel Ertachva an Bys UNESCO yn mis Gortheren 2021.

Skeusen goth a Vengleudh Bethesda, Kembra north
Mappa a dylleryow legh yn Kembra
To legh yn Gwithti Sen Fagan, Kardydh, Kembra
Yn-dann to legh yn Eglossenor, Kernow
Men bedh Syr John Betjeman yn Gwenedek, Kernow
Mengleudh Honister yn Pow an Lynnyn
Oberoryon yn Mengleudh Dinorwig, Kembra
Mengleudh Delyow Boll, Kernow